ಶಿಕಾರಿಪುರದ ತಾಳಗುಂದದ ಐತಿಹಾಸಿಕ ಶ್ರೀ ಪ್ರಣವೇಶ್ವರ ದೇವಾಲಯಕ್ಕೆ ತೆರಳಿ ಶ್ರಾವಣ ಮಾಸದ ಪೂಜೆ ಸಲ್ಲಿಸಲಾಯಿತು.
ರ್ನಾಟಕದ ಐತಿಹಾಸಿಕ ಪ್ರಥಮಗಳು ಹಾಗೂ ವಿಶೇಷತೆಗಳಿಗೆ ಹೆಸರಾಗಿರುವುದು ನಮ್ಮ ಶಿಕಾರಿಪುರ ವಿಧಾನಸಭಾ ಕ್ಷೇತ್ರ. ಅಂದಾಜು ಎರಡು ಸಾವಿರ ವರ್ಷಗಳಿಗಿಂತಲೂ ಹೆಚ್ಚಿನ ಇತಿಹಾಸವುಳ್ಳು, ಅತ್ಯಂತ ಪ್ರಾಚೀನ ಶಿವಲಿಂಗವೆಂಬ ಪ್ರತೀತಿ ಪಡೆದಿರುವ ನಮ್ಮ ಶಿಕಾರಿಪುರದ ತಾಳಗುಂದದ ಐತಿಹಾಸಿಕ ಶ್ರೀ ಪ್ರಣವೇಶ್ವರ ದೇವಾಲಯಕ್ಕೆ ತೆರಳಿ ಶ್ರಾವಣ ಮಾಸದ ಪೂಜೆ ಸಲ್ಲಿಸಲಾಯಿತು.
ಈ ಪವಿತ್ರ ದೇವಾಲಯದ ಪ್ರಾಂಗಣದಲ್ಲಿಯೇ ಕನ್ನಡದ ಮೊದಲ ದೊರೆ 'ಮಯೂರವರ್ಮರು' ಶಿಕ್ಷಣ ಪಡೆದಿದ್ದು, ಕದಂಬ ಸಾಮ್ರಾಜ್ಯದ ಸ್ಥಾಪನೆಗಾಗಿ ಮುನ್ನುಡಿ ಬರೆದದ್ದು, ಹೀಗೆ ಹತ್ತು ಹಲವಾರು ಪ್ರಥಮಗಳಿಗೆ ಕಾರಣವಾಗಿರುವ ಈ ಐತಿಹಾಸಿಕ ತಾಳಗುಂದ ನಮ್ಮ ಕ್ಷೇತ್ರದಲ್ಲಿರುವುದು ನಮ್ಮ ಸುಕೃತವೇ ಸರಿ.
ಶ್ರೀ ಪ್ರಣವೇಶ್ವರ ದೇವಾಲಯದ ಮುಂಭಾಗದಲ್ಲಿರುವ 'ಸ್ತಂಭ' ಶಾಸನವು ಐದನೇ ಶತಮಾನಕ್ಕೆ ಸೇರಿದ್ದು ಐತಿಹಾಸಿಕ ಮೌಲ್ಯಗಳು, ಕದಂಬ ವಂಶದ ಸ್ಥಾಪನೆಗೆ ಮಯೂರ ವರ್ಮನಿಗೆ ದೊರೆತ ಅವಕಾಶಗಳ ಬಗ್ಗೆ ತಿಳಿಸುವುದಷ್ಟೇ ಅಲ್ಲದೇ, ನಂತರ ಬಂದ ರಾಜವಂಶಸ್ಥರ ಸಾಧನೆಗಳ ವಿವರಣೆಗಳಿದ್ದು ಕರ್ನಾಟಕದ ಇತಿಹಾಸ ಮತ್ತು ಸಂಸ್ಕೃತಿಯ ಮೇಲೆ ಹಾಗೂ ಕದಂಬರ ಕಾಲದ ಲಿಪಿ ಶಾಸ್ತ್ರದ ಬಗ್ಗೆ ಮಹತ್ವದ ಬೆಳಕು ಚೆಲ್ಲುವ ಪ್ರಮುಖ ಶಾಸನಗಳಲ್ಲೊಂದು ಎಂಬುದು ನಾಡಿನ ಹಿರಿಮೆಯ ಪ್ರತೀಕವಾಗಿದೆ.
